ആദ്യഘട്ടത്തിൽ 362 ട്രിപ്പുകൾ; ചെങ്ങന്നൂർ റെയിൽവേ സ്റ്റേഷനിൽ സ്പെഷ്യൽ ട്രെയിനുകൾക്ക് അഞ്ച് മിനിറ്റ് സ്റ്റോപ്പ് അനുവദിക്കണം – റെയിൽവേ ബോർഡ് ചെയർമാനോട് എംപി
ചെങ്ങന്നൂർ : ശബരിമല മണ്ഡല–മകരവിളക്ക് തീർത്ഥാടന കാലത്ത് രാജ്യത്തിന്റെ വിവിധ ഭാഗങ്ങളിൽനിന്ന് എത്തുന്ന അയ്യപ്പഭക്തരുടെ യാത്രാസൗകര്യം ഉറപ്പാക്കുന്നതിനായി ഇന്ത്യൻ റെയിൽവേ 148 സ്പെഷ്യൽ ട്രെയിനുകൾ സർവീസ് നടത്തുമെന്ന് കൊടിക്കുന്നിൽ സുരേഷ് എംപി അറിയിച്ചു. റെയിൽവേ ബോർഡ് ചെയർമാനുമായി നടത്തിയ കൂടിക്കാഴ്ചയിലാണ് തീർത്ഥാടന കാലത്തെ ട്രെയിൻ സർവീസുകളുമായി ബന്ധപ്പെട്ട കാര്യങ്ങൾ എംപി ചർച്ച ചെയ്തത്.
വിവിധ റെയിൽവേ സോണുകളുടെ നേതൃത്വത്തിലാണ് സ്പെഷ്യൽ ട്രെയിനുകൾ സർവീസ് നടത്തുന്നത്. സൗത്ത് കോസ്റ്റ് റെയിൽവേ 22 ട്രെയിനുകളും സൗത്ത് സെൻട്രൽ റെയിൽവേ 56 ട്രെയിനുകളും സതേൺ റെയിൽവേ 32 ട്രെയിനുകളും സെൻട്രൽ റെയിൽവേ 18 ട്രെയിനുകളും സൗത്ത് വെസ്റ്റേൺ റെയിൽവേ 20 ട്രെയിനുകളും ഉൾപ്പെടെ ആകെ 148 സ്പെഷ്യൽ ട്രെയിനുകളാണ് സർവീസ് നടത്താൻ തീരുമാനിച്ചിട്ടുള്ളത്. ആദ്യഘട്ടത്തിൽ ഈ സ്പെഷ്യൽ ട്രെയിനുകൾ 362 ട്രിപ്പുകൾ നടത്തും.
കോട്ടയം, കൊല്ലം, തിരുവനന്തപുരം നോർത്ത് എന്നിവിടങ്ങളെ കേന്ദ്രീകരിച്ചാണ് സ്പെഷ്യൽ ട്രെയിൻ സർവീസുകൾ ക്രമീകരിച്ചിട്ടുള്ളത്. ശബരിമലയിലേക്ക് രാജ്യത്തിന്റെ വിവിധ സംസ്ഥാനങ്ങളിൽനിന്ന് എത്തുന്ന തീർത്ഥാടകർക്ക് സുഗമവും സുരക്ഷിതവുമായ യാത്ര ഉറപ്പാക്കുന്നതിന് കൂടുതൽ ട്രെയിൻ സർവീസുകൾ അനിവാര്യമാണെന്ന് കൊടിക്കുന്നിൽ സുരേഷ് എംപി പറഞ്ഞു. തീർത്ഥാടന കാലത്ത് ട്രെയിനുകളിലും റെയിൽവേ സ്റ്റേഷനുകളിലും ഉണ്ടാകുന്ന തിരക്ക് പരിഗണിച്ച് യാത്രക്കാർക്ക് ആവശ്യമായ സൗകര്യങ്ങൾ ഉറപ്പാക്കണമെന്നും അദ്ദേഹം ആവശ്യപ്പെട്ടു.
തമിഴ്നാടിന്റെ കിഴക്കൻ പ്രദേശങ്ങളിൽനിന്ന് ശബരിമലയിലേക്ക് എത്തുന്ന അയ്യപ്പഭക്തർക്ക് കൂടുതൽ പ്രയോജനകരമാകുന്ന രീതിയിൽ പുനലൂർ–കൊട്ടാരക്കര വഴി കൊല്ലത്തേക്ക് സ്പെഷ്യൽ ട്രെയിൻ സർവീസ് നടത്തണമെന്ന നിർദേശവും എംപി റെയിൽവേ അധികൃതരുടെ ശ്രദ്ധയിൽപ്പെടുത്തി.
ഈ മേഖലകളിൽനിന്ന് എത്തുന്ന തീർത്ഥാടകർക്ക് യാത്രാസൗകര്യം മെച്ചപ്പെടുത്തുന്നതിനും നിലവിലുള്ള റെയിൽവേ ശൃംഖല കൂടുതൽ ഫലപ്രദമായി ഉപയോഗിക്കുന്നതിനും ഈ സർവീസ് സഹായകരമാകുമെന്ന് അദ്ദേഹം ചൂണ്ടിക്കാട്ടി. നിർദേശം പരിഗണിച്ച് ആവശ്യമായ നടപടികൾ സ്വീകരിക്കണമെന്നും എംപി ആവശ്യപ്പെട്ടു.
ശബരിമല തീർത്ഥാടനത്തിന്റെ പ്രധാന പ്രവേശന കവാടങ്ങളിലൊന്നായ ചെങ്ങന്നൂർ റെയിൽവേ സ്റ്റേഷനിൽ സ്പെഷ്യൽ ട്രെയിനുകൾക്ക് കുറഞ്ഞത് അഞ്ച് മിനിറ്റ് സ്റ്റോപ്പ് അനുവദിക്കണമെന്നും കൊടിക്കുന്നിൽ സുരേഷ് എംപി റെയിൽവേ ബോർഡ് ചെയർമാനോട് ആവശ്യപ്പെട്ടു.
തീർത്ഥാടന കാലത്ത് ചെങ്ങന്നൂർ സ്റ്റേഷനിൽ അയ്യപ്പഭക്തരുടെ വലിയ തിരക്ക് അനുഭവപ്പെടുന്ന സാഹചര്യത്തിൽ, ട്രെയിനുകളിൽനിന്ന് ഇറങ്ങുന്നതിനും കയറുന്നതിനും ആവശ്യമായ സമയം ലഭ്യമാക്കേണ്ടത് അത്യാവശ്യമാണെന്ന് അദ്ദേഹം വ്യക്തമാക്കി. തിരക്കിനിടയിൽ ഉണ്ടാകാനിടയുള്ള ബുദ്ധിമുട്ടുകൾ കുറയ്ക്കുന്നതിനും വയോധികർ, കുട്ടികൾ, സ്ത്രീകൾ എന്നിവരുൾപ്പെടെയുള്ള തീർത്ഥാടകർക്ക് സുരക്ഷിതമായി യാത്ര ചെയ്യുന്നതിനും അഞ്ച് മിനിറ്റ് സ്റ്റോപ്പ് സഹായകരമാകുമെന്നും അദ്ദേഹം ചൂണ്ടിക്കാട്ടി.
ശബരിമല തീർത്ഥാടന കാലത്ത് കേരളത്തിലേക്ക് എത്തുന്ന അയ്യപ്പഭക്തരുടെ യാത്ര കൂടുതൽ സുഗമമാക്കുന്നതിന് റെയിൽവേയുടെ ഭാഗത്തുനിന്ന് സമയബന്ധിതമായ നടപടികൾ ഉണ്ടാകേണ്ടതുണ്ടെന്ന് എംപി പറഞ്ഞു. സ്പെഷ്യൽ ട്രെയിനുകളുടെ സർവീസ് ക്രമീകരണം, ആവശ്യമായ റൂട്ടുകളിലേക്കുള്ള സർവീസ് വിപുലീകരണം, പ്രധാന സ്റ്റേഷനുകളിൽ മതിയായ സ്റ്റോപ്പ് സമയം എന്നിവ ഉറപ്പാക്കുന്നതിനായി റെയിൽവേ മന്ത്രാലയത്തിലും റെയിൽവേ ബോർഡിലും തുടർ ഇടപെടലുകൾ നടത്തുമെന്നും കൊടിക്കുന്നിൽ സുരേഷ് എംപി അറിയിച്ചു.
Follow us on
Kundara MEDIA ©️
Facebook | Youtube | Instagram | Website
