കൊല്ലം ചിന്നക്കട ജുമാമസ്ജിദ് സന്ദർശിച്ച് ശിവഗിരി മഠത്തിലെ ശ്രീമദ് ജ്ഞാനതീർത്ഥ സ്വാമി;

March 7, 2026

5

കൊല്ലം : ശിവഗിരി മഠത്തിലെ ശ്രീമദ് ജ്ഞാനതീർത്ഥ സ്വാമി കൊല്ലം ചിന്നക്കട ജുമാമസ്ജിദ് സന്ദർശിച്ചു. വിവിധ മതവിശ്വാസങ്ങൾ തമ്മിലുള്ള പരസ്പര ബഹുമാനവും സഹവർത്തിത്വവും പ്രകടിപ്പിക്കുന്ന ഒരർത്ഥവത്തായ നിമിഷമായി ഈ സന്ദർശനം മാറി.

റമദാൻ മാസത്തിലെ ഇഫ്താർ സംഗമത്തിൽ സ്വാമി പങ്കുചേർന്നത്, സമൂഹത്തിൽ ഐക്യത്തിന്റെയും മത സൗഹൃദത്തിന്റെയും ശക്തമായ സന്ദേശമാണ് നൽകുന്നത്. പരസ്പരം അറിയുകയും മനസ്സിലാക്കുകയും ചെയ്യുന്നതാണ് സമാധാനപരമായ സമൂഹത്തിന്റെ അടിസ്ഥാനം എന്ന സത്യം ഈ സന്ദർശനം വീണ്ടും ഓർമ്മിപ്പിച്ചു.

കെപിസിസി പോളിസി റിസർച്ച് ഗ്രൂപ്പ് അംഗം അബ്ദുള്ള ആസാദും ഈ സന്ദർഭത്തിൽ ഒപ്പമുണ്ടായിരുന്നു. കൊല്ലത്ത് സംഘടിപ്പിക്കുന്ന മഹാത്മാഗാന്ധിയും ശ്രീനാരായണ ഗുരുവും തമ്മിലുള്ള ചരിത്രപ്രസിദ്ധമായ കൂടിക്കാഴ്ചയുടെ നൂറാം വാർഷികാഘോഷത്തിലേക്ക് മസ്ജിദിലെ ഇമാമിനെ ഈ അവസരത്തിൽ സ്നേഹപൂർവ്വം ക്ഷണിക്കുകയും ചെയ്തു. മസ്ജിദിലെ ഭാരവാഹികളെയും വിശ്വാസികളെയും സ്വാമിയുമായി പരിചയപ്പെടുത്തി, സൗഹൃദ സംഭാഷണങ്ങളും നടന്നു.

ഇന്നത്തെ സമൂഹത്തിൽ മതവിഭജനങ്ങളും ധ്രുവീകരണ രാഷ്ട്രീയവും ശക്തിപ്പെടുന്ന സാഹചര്യത്തിൽ, ഇത്തരം സന്ദർശനങ്ങൾ നൽകുന്ന സന്ദേശം അത്യന്തം പ്രസക്തമാണ്. മതങ്ങളെ പരസ്പരം അറിയുകയും ബഹുമാനിക്കുകയും ചെയ്യുന്ന സഹജീവിതത്തിന്റെ സംസ്കാരം – അതാണ് യഥാർത്ഥ “കേരള സ്റ്റോറി”.