നഗരമേഖലയിലെ കുടിവെള്ള ദൗർലഭ്യതയ്ക്ക്പരിഹാരമാകുന്ന ഞാങ്കടവ് കുടിവെള്ളപദ്ധതി അവസാനഘട്ടത്തിൽ. കൊല്ലം കോർപ്പറേഷൻ നടപ്പാക്കുന്നപദ്ധതി 2026 മെയ് മാസം കമ്മീഷൻ ചെയ്യുന്നതോടെ 24 മണിക്കൂറും നഗരത്തിൽ ശുദ്ധജല ലഭ്യത ഉറപ്പാകും. അമൃത് ഒന്നാം ഘട്ടം, രണ്ടാംഘട്ടം, കിഫ്ബി ഫണ്ടുകൾ ഉപയോഗിച്ച് 600 കോടി രൂപ ചിലവിലുള്ള പദ്ധതിയാണ് ഞാങ്കടവ്. അമൃത് ഒന്നാം ഘട്ടത്തിൽ നിന്നും 104.42 കൂടിയും രണ്ടാംഘട്ടത്തിൽ നിന്ന് 227.13 കോടിയും കിഫ്ബി ഫണ്ടിൽ നിന്ന് 235 കോടിയുമാണ് ഭരണാനുമതിയായത്.
കടവൂർ, ശക്തികുളങ്ങര, ആശ്രാമം, കിളികൊല്ലൂർ, ആനന്ദവല്ലീശ്വരം, ജലഭവൻ, വടക്കേവിള, ബിഷപ്പ് ജെറോം എന്നിവിടങ്ങളിലെ സംഭരണികളിലൂടെയാണ് ശാസ്താംകോട്ട കുടിവെള്ള പദ്ധതിയുടെ ഭാഗമായി നിലവിൽ നഗരത്തിൽ വെള്ളം എത്തിക്കുന്നത്. ഞാങ്കടവ് കുടിവെള്ള പദ്ധതിയുടെ ഭാഗമായി മണിച്ചിത്തോട്ടിലും വസൂരി ചിറയിലും പുതിയ ജലസംഭരണി നിർമിച്ചു കഴിഞ്ഞു. ആനന്ദവല്ലീശ്വരത്തും ബിഷപ്പ് ജെറോം നഗറിലും നിലവിലുള്ളവ കൂടാതെ പുതിയ ജലസംഭരണിയുടെയും അഞ്ചാലുംമൂട്, മുണ്ടയ്ക്കൽ, ഇരവിപുരം എന്നിവിടങ്ങളിൽ പുതിയ ജലസംഭരണിയുടെയും നിർമാണം ഉടൻ തുടങ്ങും.
പുന്തലത്താഴത്തിനടുത്ത് വസൂരിചിറയിലെ ഏഴ് ഏക്കറിലാണ്പദ്ധതിക്കായി ജലശുചീകരണ പ്ലാന്റ്. കല്ലടയാറിൽനിന്നും ജലം പ്രധാന പൈപ്പിലൂടെ 28 കിലോമീറ്റർ അകലെയുള്ള വസൂരി ചിറയിലെ പ്ലാന്റിൽ എത്തിച്ച് ശുദ്ധീകരിച്ചതിന് ശേഷം പൈപ്പുകൾവഴി വിവിധ ഭാഗത്തെ ജലസംഭരണികളിലേക്കും അവയിൽനിന്നും ചെറിയ പൈപ്പുകളിലേക്കും ഗാർഹികവിതരണ പൈപ്പുകളിലേക്കും എത്തിക്കുകയാണ് ലക്ഷ്യം.
കുണ്ടറ-പെരിനാട് പഞ്ചായത്ത് റോഡ് വഴിയുള്ള പൈപ് ലൈൻ പ്രവർത്തനങ്ങൾ രണ്ടുമാസത്തിനകം പൂർത്തിയാകും. 2026 മെയ് മാസത്തോടെ പ്ലാന്റ് കമ്മീഷൻ ചെയ്യാനാകുമെന്നാണ് പ്രതീക്ഷ. ആധുനിക രീതിയിലുള്ള സ്‌കോഡ പമ്പ് സെറ്റുകളാണ് വെള്ളം കൊണ്ടുവരുന്നതിനായി ഉപയോഗിക്കുന്നത്. (ഒരു മണിക്കൂറിൽ ശുദ്ധീകരിച്ചതും ഒരു ദിവസം ശുദ്ധീകരിച്ചതുമായ ജലത്തിന്റെ അളവ്, ഗുണനിലവാരം തുടങ്ങി എല്ലാ വിവരങ്ങളും നൽകുന്ന ഓട്ടോമേറ്റഡ് സംവിധാനമാണ് സൂപ്പർവൈസറി കൺട്രോൾ ആൻഡ് ഡാറ്റാ അക്വിസിഷൻ സിസ്റ്റം എന്ന സ്‌കോഡ.) ഇതിലൂടെ ജലശുദ്ധീകരണവും ജലവിതരണവും 24 മണിക്കൂറും കൺട്രോൾ റൂമിലിരുന്ന് നിരീക്ഷിക്കാൻ കഴിയും.
ആനന്ദവല്ലീശ്വരത്ത് പുതിയ പ്ലാന്റ് നിർമിച്ച് ജലം എത്തിക്കാനുള്ള ശ്രമങ്ങളും പുരോഗമിക്കുകയാണ്. വാട്ടർ അതോറിറ്റിക്കാണ് പദ്ധതിയുടെ മേൽനോട്ട ചുമതല. ഞാങ്കടവിൽ നിന്ന് വെള്ളം പമ്പ് ചെയ്ത് 100 എം എൽ ഡി ശേഷിയുള്ള വസൂരി ചിറയിലെ ജലസംഭരണിയിൽ എത്തിച്ച് ശുദ്ധീകരിച്ച് കോർപ്പറേഷന്റെ വിവിധ ഭാഗത്തേക്ക് എത്തിക്കും. 40500 ഗാർഹിക കണക്ഷനും ഞാങ്കടവ് കുടിവെള്ള പദ്ധതി ഉറപ്പാക്കും. ശാസ്താംകോട്ട ശുദ്ധജല തടാകത്തിൽനിന്നെത്തുന്ന ജലം ശേഖരിക്കുന്ന സംഭരണികളിലേക്കും പുതുതായി നിർമിക്കാൻ പോകുന്ന ആറ് ജലസംഭരണികളിലേക്കും ജലശേഖരണം നടത്തിയാകും വസൂരിച്ചിറയിലെ പ്ലാന്റ് തുറന്നു പ്രവർത്തിക്കുക എന്ന് വാട്ടർ അതോറിറ്റി എക്‌സിക്യൂട്ടീവ് എഞ്ചിനിയർ എം.സി നാരായണൻ പറഞ്ഞു.
Follow us on
Kundara MEDIA
Facebook | Youtube | Instagram | Website | Threads | Whatsapp | X
വാർത്തകളും പരസ്യങ്ങളും നൽകാൻ വാട്സാപ്പ് മെസ്സേജ് ചെയ്യുക..+916238895080