ശബരിമല 03.01.2024: അമ്പത് തവണ മലചവിട്ടി അയ്യപ്പസ്വാമിയെ തൊഴുതതിന്റെ സംതൃപ്തിയിലാണ് അദ്രിതി തനയ. പത്ത് വയസ് പൂർത്തിയാകാൻ ഒരു ദിവസം മാത്രം ബാക്കി നിൽക്കെയാണ് അമ്പതാം തവണയും മലചവിട്ടി അയ്യപ്പനെ തൊഴുത് അദ്രിതി മലയിറങ്ങിയത്. അച്ഛൻ അഭിലാഷ് മണിയുടെയും സുഹൃത്തുക്കളുടെയും ഒപ്പം ജനുവരി 3 ന് വൈകുന്നേരം നാലുമണിയോടെയാണ് അദ്രിതി അൻപതാം തവണ പതിനെട്ടാം പടി ചവിട്ടി അയ്യപ്പ ദർശനം നടത്തിയത്. എരുമേലിയിൽ പേട്ടതുള്ളിയ ശേഷമാണ് ഇന്നലെ സന്നിധാനത്ത് എത്തിയത്.
കൊല്ലം ജില്ലയിൽ എഴുകോൺ എഴുകോൺ കോതേത്ത് വീട്ടിൽ അഭിലാഷ് മണിയുടെയും നീതു ലക്ഷ്മിയുടെയും മകളാണ് കുഞ്ഞി എന്ന് വിളിക്കുന്ന അദ്രിതി തനയ. ഒൻപതു മാസം പ്രായമുള്ളപ്പോൾ മുതൽ ശബരിമല ദർശനം ആരംഭിച്ചതാണ് ഈ കുഞ്ഞു മാളികപ്പുറം. എല്ലാ മാസവും ശബരിമലയ്ക്ക് പോകാറുണ്ട് എന്ന പ്രത്യേകത കൂടിയുണ്ട് ഈ കുഞ്ഞു മാളികപ്പുറത്തിനും അച്ഛനും.
ഈ കഴിഞ്ഞ ധനുമാസത്തിൽ കാനനപാതയായ പുല്ലുമേട് വഴിയും അദ്രിതി ശബരിമലയിൽ എത്തിയിരുന്നു. കഴിഞ്ഞ ഓണത്തിന് എത്തിയപ്പോൾ മാളികപ്പുറം മേൽശാന്തി അദ്രിതിക്ക് ഓണക്കോടിയും നൽകിയിരുന്നു. ഒരുപക്ഷെ ആദ്യമായിട്ടായിരിക്കും പത്തു വയസ്സിനുള്ളിൽ ഒരു മാളികപ്പുറം 50 തവണ ശബരിമല ദർശനം നടത്തുന്നതും മേൽശാന്തിയിൽ നിന്നും ഓണക്കോടി സമ്മാനമായി ലഭിക്കുന്നതും. എഴുകോൺ ശ്രീനാരയണ ഗുരു സെൻട്രൽ സ്‌കൂളിലെ നാലാം ക്ലാസ് വിദ്യാർത്ഥിയാണ് അദ്രിതി.
Follow us on
KUNDARA MEDIA
Facebook | Youtube | Instagram | Website | Threads | Whatsapp
വാർത്തകളും വിശേഷങ്ങളും വിരൽത്തുമ്പിൽ